Қазақстанда құрылыс талаптарын сақтамайтын компанияларға бақылау күшейтіледі, — деп хабарлайды «Dalamedia » ақпараттық порталы.

Өнеркәсіп және құрылыс министрлігінің мәліметінше, елде құрылыс сапасына қатысты талаптарды бұзған мердігер мекемелердің лицензиясын қайтарып алу мәселесі қаралып жатыр. Бұл бастама тұрғын үйлер мен әлеуметтік нысандардың сапасын арттыру мақсатында қолға алынған.

Ведомство өкілдерінің айтуынша, кейбір құрылыс компаниялары белгіленген нормаларды сақтамай, сапасыз жұмыс жүргізеді. Мұндай жағдайлардың алдын алу үшін бақылау тетіктері күшейтілмек.

Сондай-ақ құрылыс саласындағы заң талаптарын бірнеше рет бұзған ұйымдарға қатысты қатаң шаралар қолдану ұсынылып отыр.

Мамандар бұл өзгерістер нарықтағы жауапкершілікті арттырып, тұрғындардың қауіпсіздігін қамтамасыз етуге ықпал етеді деп отыр.