Батыс Қазақстан облысында киіктердің жаппай қырылуы тіркеліп, аурудың малға да жұғуы тұрғындарды алаңдатып отыр, ,-деп хабарлайды «Dalamedia» ақпараттық порталы.

Облыс әкімдігінің мәліметінше, зерттеу нәтижесінде киіктерден пастереллез ауруы анықталған. Қазір киіктердің қырылуы күн сайын жалғасып жатыр. Жергілікті тұрғындар аурудың төрт түлікке таралып жатқанын айтып, дабыл қағуда.

Мамандардың айтуынша, пастереллез көбіне Жәнібек пен Казталов аудандарындағы киіктерден анықталған. Бұдан бөлек, Жаңақала, Бөкей ордасы және Ақжайық аудандарында да киіктер шоғырланған. Инспекторлардың бақылауында шамамен 1,9-2 миллион бас киік бар.

Қазір Бөкей ордасы, Жәнібек және Казталов аудандарында “Охотзоопром” инспекторлары мен резерват қызметкерлері жергілікті атқарушы органдармен бірлесіп, киік өлекселерін жинау және жою жұмыстарын жүргізіп жатыр.

Әкімдік мәліметіне сәйкес, бүгінге дейін облыс аумағында 3281 бас киіктің өлексесі жойылған. Оның ішінде 1547-сі аталық, 1617-сі аналық, 117-сі лақ.

Алайда өлекселерді жоюда қиындық туындап отыр. Себебі ауылдық округтердегі мал қорымдарының көбі толып кеткен. Бұған қоса, арнайы техниканың, әсіресе экскаваторлардың жетіспеуі жұмысты баяулатып отыр.

Айта кетейік, пастереллез – мал мен жануар арасында тез тарайтын жұқпалы ауру. Ол ішкі ағзаларды зақымдап, ауру асқынған жағдайда өлімге әкелуі мүмкін.

Осыған дейін әлеуметтік желіде Торғай өңірінде де киіктермен бірге малдың қырылып жатқаны түсірілген видео тараған еді.