Шара барысында марқұм жазушының рухына құран бағышталды. Қаламгер былтыр 10 қаңтарда 84 жасында дүниеден өткен болатын.

Жазушының ұлы Едіге Мағауин құлпытастың мән-мағынасына тоқталып, оны әдейі тауға ұқсатып жасатқанын айтты. Оның сөзінше, бұл бейне әке мұрасын, қазақ тарихының терең тамырын және ұрпаққа жалғасқан рухани сабақтастықты білдіреді.

Құлпытастың бір қырында көне түркі жазуы бейнеленсе, келесі жағында қазақ тарихының түрлі кезеңдері – Шыңғыс хан дәуірінен бастап, Алтын Орда мен Қазақ хандығы кезеңі көрініс тапқан. Бұл да жазушының шығармашылық бағытымен тікелей байланысты екені айтылды.

Мұхтар Мағауин 1940 жылы Семей облысының Шұбартау ауданында дүниеге келген. Ол Қазақ мемлекеттік университетінің филология факультетін тәмамдап, еңбек жолын әдебиет пен ғылым саласынан бастаған.

Жазушы ұзақ жылдар бойы баспа ісі мен әдеби журналдарда қызмет етіп, қазақ прозасы мен тарихи романдардың дамуына зор үлес қосты. “Аласапыран” тарихи романы үшін мемлекеттік сыйлыққа ие болған.

Мағауин 2007 жылдан бастап шетелде өмір сүріп, Чехия мен АҚШ-та тұрған. Ол қаламгерлік жолында тарихи тақырыптарды терең зерттеп, ұлттық болмыс пен руханият мәселелерін шығармаларына арқау етті