Шымкент қаласы бойынша Қаржы мониторингі агенттігінің департаменті өзін экономикалық тергеп-тексеру қызметінің қызметкері ретінде таныстырған алаяқты ұстады, — деп хабарлайды «Dalamedia» ақпараттық порталы.

Тергеу дерегіне сәйкес, 2025 жылдың қыркүйек айында күдікті жергілікті компаниялардың бірінің басшысымен байланысып, өзін ресми тексеру органының өкілі ретінде көрсеткен. Ол медициналық мекемелерді тексеру тізімінен алып тастауға көмектесемін деген сылтаумен 25 миллион теңге алған.

Кейін күдікті ұсталып, уақытша ұстау изоляторына қамауға алынды. Қазір сотқа дейінгі тергеу амалдары жүргізіліп жатыр. Заңға сәйкес, өзге мәліметтер тергеу мүддесіне байланысты жария етілмейді.

Агенттік азаматтарды мұндай жағдайларда сақ болуға, ақпаратты тек ресми дереккөздерден тексеруге және алаяқтардың арбауына түспеуге шақырды.

Егер осындай фактілерге тап болсаңыз, 1458 нөмірлі колл-орталыққа хабарласуға немесе “АФМ Insider” Telegram-боты арқылы ақпарат беруге болады.

Бұған дейін де алаяқтықтың тағы бір жағдайы тіркелген. Онда 71 жастағы тұрғынды белгісіз тұлғалар қорқытып, өзін полиция мен “заңгер” ретінде таныстырып, қаражатын “қауіпсіз шотқа” аудартуға әрекет жасаған. Зейнеткер 3,8 миллион теңгесін шешіп алып, аударым жасау кезінде ғана алаяқтардың арбауы әшкереленген.