Forbes Women Kazakhstan журналы сәуір айындағы санында елдегі ең бай 25 әйелдің алғашқы рейтингін ұсынды. Тізімге енгендердің жиынтық капиталы 8,1 млрд доллар деп бағаланған,-деп хабарлайды «Dalamedia» ақпараттық порталы.

Басылым дерегінше, бұл рейтинг дәстүрлі Forbes Kazakhstan тізімінен өзгеше. Мұнда әйелдердің активтері көбіне отбасылық немесе серіктестік бизнеске негізделген. Яғни байлықтың басым бөлігі мұрагерлік, неке немесе ірі бизнес топтарындағы үлеспен байланысты. Соған қарамастан, тізімдегі әйелдер тек үлес иесі ғана емес, бизнесті тікелей жүргізіп, жаңа бағыттарды дамытуға белсенді араласып жүргені атап өтіледі.

Рейтингтің көшін Динара Құлыбаева бастады. Оның байлығы 5,4 млрд доллар деп бағаланған. Ол Halyk Bank-тегі үлесі арқылы қаржы секторындағы ірі активтерді бақылап отыр және халықаралық миллиардерлер тізіміне енген санаулы қазақстандық әйелдердің бірі.

Екінші орында 650 млн доллармен Мұқадасхан Ибрагимова тұр. Үштікті 550 млн доллар капиталымен Дариға Назарбаева түйіндейді. Алғашқы бестікте сондай-ақ Анжела Сәрсенова (249 млн доллар) мен Айжан Есім (207 млн доллар) бар.

Тізімнің келесі бөлігінде Айдан Сүлейменова, Қаншайым және Жанна Сейтжанова, Алена Сүлейменова, Гаухар Қаппарова мен Гүлнар Досаева сияқты ірі бизнес өкілдері орналасқан. Олардың әрқайсысы мұнай, ритейл, жылжымайтын мүлік және білім салаларында жұмыс істейді.

Сондай-ақ рейтингке Раушан Сағдиева, Ирина Козлова мен Александра Соколова, Любовь Дружинина, Сәуле Сейсембаева және Элеонора Баталова секілді кәсіпкерлер енген. Бұл қатарды Карина Сәрсенова, Әлия Маханова, Наталья Акентьева, Сәуле Зейнолла және Амина Қасымова жалғастырады.

Тізімнің соңғы бөлігінде Сандуғаш Кемелбаева, Галина Зкрияева, Амина Ажмағанбетова, Гаухар Абықаева және Жанна Кан бар. Олардың капиталы 28–34 млн доллар аралығында бағаланған.

Жалпы алғанда, бұл рейтинг Қазақстандағы әйелдердің ірі бизнес пен инвестициядағы ықпалы артып келе жатқанын көрсетеді.