Астанада азық-түлік қауіпсіздігін қамтамасыз ету және «Заң мен тәртіп» қағидатын сақтау бойынша кешенді шаралар жүзеге асырылып жатыр,-деп хабарлайды «Dalamedia» ақпараттық порталы. Бұл туралы қалалық Инвестициялар және кәсіпкерлікті дамыту басқармасы басшысының орынбасары Мақсат Жаңабаев пен «Astana» ӘКК» АҚ басқарма төрағасының орынбасары Ділмұрат Имінов брифингте айтты.

Елордада бағаны тұрақтандыру үшін 24 мың тонна өнім жеткізуге келісімшарт жасалып, 190-нан астам сауда орны арқылы сатылуда. Сауда желілерімен үстемені 10%-дан асырмау туралы келісім бар. 2024 жылы дефляция 98,9%, 2025 жылы инфляция 107,4% болды. 2026 жылдың басынан бері баға индексі 101,1% деңгейінде қалыптасты, бұл республикалық көрсеткіштен төмен.

Делдалдық схемаларды тергеу жөніндегі өңірлік комиссия 2026 жылдың басынан 32 отырыс өткізіп, сауда үстемесінің асып кетуіне қатысты 80-нен астам іс тіркеді. Күн сайын баға мониторингі жүргізіліп, жеткізушілердің міндеттемелері бақыланады.

Агроөнеркәсіп кешенін дамыту үшін 180 млрд теңгеге 7 жоба жүзеге асып, 1,6 мың жұмыс орны құрылуда. 40 млрд теңгеден астам инвестицияға аграрлық-индустриялық аймақ пен логистикалық парк жоспарланған. 2026 жылдың басынан 15 заңсыз сауда нысаны демонтаждалды, 2025 жылы олардың саны 225 болған. Металл сынықтарының айналымына 2024 жылдан лицензиялау енгізілді.