Ұлыбританияда темекіге қатысты қатаң шектеу енгізіп, «шылымсыз ұрпақ» қалыптастыруға бағытталған тарихи заң қабылданды, — деп хабарлайды «Dalamedia» ақпараттық порталы.

Жаңа заңға сәйкес, 2009 жылдың 1 қаңтарынан кейін туған азаматтарға темекі өнімдерін өмір бойы сатуға тыйым салынады. Құжат Ұлыбритания парламентінде мақұлданып, енді Карл III патшаның қол қоюын күтіп отыр.

Заңның негізгі тетігі – жас шектеуін жыл сайын біртіндеп көтеру. Осылайша уақыт өте келе белгілі бір жылдан кейін туған барлық буын темекі сатып алу құқығынан толық айырылады. Яғни, бұл ұрпақ жасына қарамастан, 20, 30 немесе 40 жасқа толса да темекі сатып ала алмайды.

Бұған дейін кәмелет жасына толмағандарға темекі сатуға тыйым салынған еді. Ал жаңа бастама бұл шектеуді одан әрі күшейтіп, біртіндеп толық тыйымға айналдыруды көздейді.

Қоғамдық қолдауға келсек, Ұлыбритания тұрғындарының шамамен 68 пайызы бұл бастаманы қолдап отыр.