Атырау облысында балалардың дер кезінде көмек сұрауының арқасында әйелдің өмірі сақталып қалды, — деп хабарлайды «Dalamedia» ақпараттық порталы.

Оқиға 22 сәуір кешкі уақытта болған. Үйге кіре алмаған балалар полицияға хабарласып, көмек сұраған. Шақырту бойынша жедел жеткен патрульдік қызметкерлерге көршілер пәтерден газдың өткір иісі шығып жатқанын жеткізген.

Жағдайдың қауіпті екенін бірден аңғарған тәртіп сақшылары уақыт жоғалтпай, пәтер есігін бұзып ішке кірген. Ішке енген кезде олар ес-түссіз жатқан әйелді байқап, жедел жәрдемді күтпестен өз көліктерімен ауруханаға жеткізген.

Тексеру кезінде ас үйдегі газ плитасының бұрандалары ашық қалып, соның салдарынан газ тарағаны анықталған. Оқиға орнында полицейлер қауіпсіздік шараларын қолға алып, арнайы газ қызметін шақырған.

Қазір оқиғаның нақты себептері мен мән-жайы анықталып жатыр.