Қарағандыда халықаралық іздеуде жүрген ер адам қолға түсті. Ол ірі көлемде ақша бопсалады деген күдікке ілінген, – деп хабарлайды «Dalamedia» ақпараттық порталы.

Полицияның мәліметінше, арнайы операция қаладағы жекеменшік үйлердің бірінде жүргізілген. Тінту барысында тәртіп сақшылары ваннаның астынан шағын есікті байқайды. Алғашында оны жай ғана жасырын сөре деп топшылағанымен, кейін бұл тар өткелдің жерқоймаға апаратыны анықталған. Сол жерде іздеуде жүрген азамат жасырынған.

Кіреберісінің ені мен биіктігі небәрі жарты метрге жуық бұл қуысқа күдікті еңбектеп кіріп жүрген. Жерқойманың іші толық жабдықталған: кереуеті, қажетті тұрмыстық заттары бар. Сырт көзге қарапайым ванна секілді көрінгенімен, оның артында арнайы жасалған жасырын бөлме болған.

Қарағанды облысы Полиция департаменті бастығының бірінші орынбасары Қуаныш Орынбетовтің айтуынша, күдікті ұзақ уақыт бойы түрлі айла қолданып, құқық қорғау органдарынан бой тасалап келген.

Алдын ала дерек бойынша, ол қала тұрғынын қорқытып, 117 миллион теңге бопсалады деген күдікке ілінген.

Қазір 43 жастағы ер адам ұсталып, уақытша ұстау изоляторына қамалды. Аталған дерек бойынша сотқа дейінгі тергеу амалдары жүргізіліп жатыр.