Соңғы уақытта әлеуметтік желілерде, әсіресе TikTok-та, қазақстандық оқушылардың мұғалімдерді келемеждейтін, олардың фотосын рұқсатсыз пайдаланып, жағымсыз мазмұндағы видеолар жариялауы жиілеген,-деп хабарлайды «Dalamedia» ақпараттық порталы.

Осыған байланысты Мәжіліс депутаты Асхат Аймағамбетов педагогтарды мұндай буллингке бейжай қарамай, құқық қорғау органдарына жүгінуге шақырды. Оның айтуынша, қолданыстағы заңнама мұндай әрекеттерді реттеуге мүмкіндік береді, ал полиция кінәлі тұлғаларды анықтауда заманауи тетіктерді пайдалана алады.

Маңғыстау облысы Мұнайлы ауданындағы №17 мектепте де осындай жағдай тіркелген. Мектеп әкімшілігі оқушылардың мұғалімдерге қатысты әдепсіз контент таратқанын анықтап, кейін оқушылар мен ата-аналардың кешірім сұраған бейнеүндеуін жариялаған.

Мектеп тарапынан жүргізілген тексеру барысында сынып жетекшілер, пән мұғалімдері, психолог пен мектеп инспекторының қатысуымен арнайы жиналыс өтіп, оқиға жан-жақты талқыланған. Нәтижесінде оқушылар өз әрекеттерін мойындап, кешірім сұраған.

Депутаттың айтуынша, мұндай жағдайларда ата-аналардың жауапкершілігі де қарастырылуы мүмкін, ал кейбір әрекеттер әкімшілік ғана емес, қылмыстық жауапкершілікке дейін жетуі ықтимал.