Биылғы жылдың алғашқы тоқсанында мемлекеттік бюджет кірісі өткен жылмен салыстырғанда 17 пайызға ұлғайды, — деп хабарлайды «Dalamedia» ақпараттық порталы.

Премьер-министрдің төрағалығымен өткен Үкімет отырысында бірқатар мәселе қаралды. Қаржы министрі Мәди Такиевтің мәліметінше, бюджет кірісі 6,4 трлн теңгеге жетіп, былтырғы көрсеткіштен 931 млрд теңгеге артқан.

Министрдің айтуынша, республикалық бюджетке 4,2 трлн теңге түсіп, жоспар 102 пайызға орындалған. Түсімдердің артуына сыртқы факторлар да ықпал еткен. Атап айтқанда, мұнайдың орташа бағасы барреліне 80,6 доллар деңгейінде болуы әсер еткен. Экспорттық кедендік баж есебінен қазынаға қосымша 40,5 млрд теңге түскен.

Сонымен қатар теңге бағамының өзгеруі де әсер еткен. Нақты курс болжанған 540 теңгеден өзгеше болып, бір доллар үшін 497,7 теңге деңгейінде тұрақтаған. Соның салдарынан бюджет кірісі 146 млрд теңгеге кеміген.

Мәди Такиев есепті кезеңде мемлекеттік қаржының тұрақтылығы сақталғанын атап өтті. Оның сөзінше, барлық әлеуметтік міндеттемелер уақытылы қаржыландырылып, өңірлерге толық қолдау көрсетілген.

«Әлеуметтік міндеттемелерді қаржыландыруға 1,8 трлн теңге бағытталды. Қазір басты басымдық – қаражатты жай игеруден нақты нәтижеге бағытталған қаржыландыруға көшу», – деді министр.