Елімізде енді мемлекеттік туды балконға және көлікке ілуге рұқсат берілмек. Дегенмен бұл ретте нақты талаптар қатаң сақталуы тиіс,-деп хабарлайды «Dalamedia» ақпараттық порталы.

Жаңа талаптарға сәйкес, балконға орналастырылған ту жерден кемінде 3 метр биіктікте болуы керек. Сондай-ақ оны терезеге немесе балконның сыртқы бөлігіне жабыстырып қоюға болмайды, туды 45 градус көлденең қалыпта орналастыру талап етіледі.

Мемлекеттік рәміз міндетті түрде бүтін, жыртылмаған, түсі оңып кетпеген әрі бекітілген ұлттық стандарттарға сай болуы шарт.

Туды түнгі уақытта арнайы жарықпен жарықтандыру міндеттелмейді.

Сонымен бірге мемлекеттік ту жерге, еденге немесе суға тимеуі тиіс. Оны киім, төсек-орын бұйымдары немесе кез келген тұрмыстық жабын ретінде қолдануға, сондай-ақ жарнамалық мақсатта пайдалануға қатаң тыйым салынған.