Алматыда Мәдениет және ақпарат министрі Аида Балаева «Қайрат» футбол клубының шабуылшысы Дастан Сәтпаевқа «Дарын» мемлекеттік жастар сыйлығын табыстады, -деп хабарлайды «Dalamedia» ақпараттық порталы.

Танымал қазақстандық спортшы 2025 жылғы сыйлықтың «Спорт» номинациясы бойынша лауреат атанған. Алайда жарыстарға қатысуына байланысты ол марапатты тапсыру рәсіміне сол жылы қатыса алмаған.

Салтанатты жиында сөз сөйлеген Аида Балаева Дастан Сәтпаевтың тек жоғары нәтиже көрсетіп қана қоймай, жас ұрпаққа үлгі болып жүргенін атап өтті. Оның айтуынша, спортшы балаларды спортқа баулып, салауатты өмір салтын насихаттауға үлес қосып келеді.

Министр сондай-ақ Мемлекет басшысының еңбектің қадірі мен оның ел игілігі үшін маңызды екенін үнемі айтып келе жатқанын еске салды. Спорттың адамды биік белестерге жетелеп, ел абыройын арттыратынын да тілге тиек етті.