Түркістан облысында Сарыағаш қаласын айналып өтетін жаңа автожолдың құрылысы басталды, — деп хабарлайды «Dalamedia» ақпараттық порталы. Бұл туралы Көлік министрлігінің баспасөз қызметі хабарлады.

Мемлекет басшысының тапсырмасына сай басталған жоба елдің оңтүстігіндегі көлік қатынасын жақсартып, халықаралық бағыттағы транзиттің қарқынын арттыруды көздейді. Жаңа жол іске қосылғаннан кейін транзиттік көліктер қала ішіне кірмей-ақ айналып өтеді. Бұл, өз кезегінде, Сарыағаштағы жол жүктемесін азайтып, Өзбекстанға қатынайтын көліктердің қозғалысын жеделдетеді.

Жоба аясында ұзындығы 102,6 шақырым болатын төрт жолақты заманауи автожол салынбақ. Жүк тасымалы мен жолаушылар қатынасы жылдамдап, шекара маңындағы сауда жандана түседі. Сонымен қатар Түркістан облысының халықаралық бағыттардағы көлік торабы ретіндегі маңызы арта түспек.

Өңірде жол инфрақұрылымын жаңарту жұмыстары да қатар жүріп жатыр. Қазір республикалық маңызы бар автожолдардың жалпы ұзындығы 678 шақырымды құрайды. Соның ішінде негізгі бағыттарда жалпы ұзындығы 99,2 шақырым болатын бес жоба бойынша күрделі және орташа жөндеу жұмыстары жүргізілуде. Бұл жұмыстар аясында жол айырықтары мен көпірлер де жаңғыртылып жатыр.

Ал 2026 жылы «Шымкент – Қызылорда» бағытындағы автожолда қосымша бес орташа жөндеу жобасын іске асыру жоспарланған. Олардың жалпы ұзындығы 103 шақырымды құрайды.