Алматыда пәтер ұрлығымен айналысқан топтар құрықталды, — деп хабарлайды «Dalamedia» ақпараттық порталы polisia.kz сайтына сілтеме жасап.

Алматы облысында өткен жылдың желтоқсанынан бастап пластик терезелерді бұзып, ұрлық жасаумен айналысқан қылмыстық топ ұсталды. Күдіктілер алтын әшекейлерді, қолма-қол ақшаны және өзге де бағалы дүниелерді қолды қылып, тұрғындарға 21 миллион теңгеден астам шығын келтірген. Жедел іздестіру шараларының нәтижесінде 20 наурыз күні криминалдық полиция қызметкерлері оларды қолға түсіріп, уақытша ұстау изоляторына қамады. Тергеу барысында олардың тоғыз пәтерге түскені анықталды.

Бұдан бөлек, 24 наурызда облыс аумағында тағы бір ұрлықпен айналысқан топ құрықталды. Олардың еншісінде үш қылмыс бар. Аталған топ құрамында 14 пен 17 жастағы жасөспірімдер де бар.

ІІМ тұрғындарды қауіпсіздік талаптарын ескеруге шақырады. Мамандар есікке сапалы құлып орнатып, терезелерге темір тор қою қажеттігін айтады. Әлеуметтік желіде бағалы заттар мен олардың сақталатын орны туралы ақпаратты жарияламау, ірі көлемдегі ақша мен алтын бұйымдарды көзге түсетін жерге қалдырмау да — қауіптің алдын алудың маңызды жолы екенін еске салады.