Астанада маса мен шіркейлерге қарсы күрес шаралары атқарылыпмаусымға дайындық кезеңінен өтті — деп хабарлайды «Дала медиа» ақпараттық порталы.

Қоршаған ортаны қорғау және табиғатты пайдалану басқармасының мәліметінше, биыл дезинсекциялық жұмыс алты кезеңге бөлініп жүргізіледі. Қазіргі уақытта қалада энтомологиялық мониторинг басталған: мамандар су қоймаларын жәндіктердің дернәсілдері үшін тексеруде.

Ветеринария және фитосанитария бөлімінің басшысы Азат Тұрапбаев өңдеу жұмысы сәуірдің екінші жартысынан басталатынын жеткізді.

- Күніне шамамен 110–120 дезинсектор жұмылдырылатын болады. Алты кезеңнің әрқайсысы бірнеше сатыдан тұрады: алдымен су қоймалары өңделіп, кейін ашық аумақтарға — саябақтарға, гүлзарларға, тұрғын алаптар мен жолдарға өтеді. Іс-шара орталықтан басталып, қала шетіне қарай жалғасады. 2 сәуірден бастап шағын су қоймалары мен батпақты жерлерде энтомологиялық мониторинг жүргізіліп жатыр. Ғылыми топ тексеруге шықты. Дайындық шаралары толық аяқталған: техника, жабдықтар және персонал дайын. Су қоймаларынан дернәсілдер табылғаннан кейін өңдеуге кірісеміз», — деді «Астаналық дезинфекция» ЖШС-нің атқарушы директоры Алтынбек Мертасов.

Мамандар өңдеу кезінде адамдар мен жануарларға қауіпсіз, жұмсақ препараттар қолданылатынын, ал су қоймалары үшін экожүйеге зиян келтірмейтін биологиялық құралдар пайдаланылатынын атап өтті.

Қолданылатын техникаға моторлы арқалық бүріккіштер, ыстық тұман генераторлары, дезинсекциялық машиналар, қайыққа арналған жабдықтар және агродрондар кіреді.

Дезинсекциялық шаралар Астана тұрғындары мен қала экожүйесіне қауіп төндірмей, тиімді түрде жүзеге асырылмақ.