Қазақстандық композитор Қуат Әбіл желіде Bayansulu лақап атымен танымал Баянсұлу Сағындықованың бірнеше әнінің авторы екенін айтып, өзіне тиесілі қаламақы төленбегенін мәлімдеді — деп хабарлайды «Dalamedia» ақпараттық порталы.

Қуат Әбілдің сөзінше, ол әншінің «Ұмытсам да», «Сондайым бар енді», «Ауа райы», «Күтемін» және «Lalala» атты бес композициясын жазған. Бастапқыда Баянсұлумен келісімге келгенде композитордан ақша талап етілмеген, тек танымалдыққа қол жеткізу жеткілікті деп айтылған. Алайда әндер хитке айналғаннан кейін қаламақы мәселесі туындаған.

«Мен барымды салып, жақсы әндерімді бердім. Ал енді өз құқығымды талап еткенде, керісінше, сотқа шақырту алдым. Бұл әділдік пе?» — дейді Қуат Әбіл видеоүндеуінде.

Композитор сондай-ақ бұрын әндердің YouTube-тағы кейбір нұсқалары өшірілгенін, кейін қайта жүктелгенін, бірақ қаламақы төленбегенін айтты. Баянсұлудың бұрынғы продюсерімен жұмысын тоқтатқаннан кейін жаңа командасы Қуат Әбілге қайта жүгінген, бірақ мәселе әлі шешімін таппаған.

Айта кетейік, Баянсұлу өзінің «Ауа райы», «Сондайым бар енді», «Ұмытсам да» сынды әндері арқылы халыққа кеңінен танылған еді. Қазір композитор әділдік іздеп, өз құқығын қорғау үшін үндеу жасауда.