Қазақстанда болашақ зейнетақы көлемін арттыру үшін жұмыс берушілердің міндетті төлемдері ұлғайтылып жатыр,,-деп хабарлайды «Dalamedia» ақпараттық порталы. Жаңа тәртіпке сәйкес, жұмыс берушінің зейнетақы жүйесіндегі жауапкершілігі кезең-кезеңімен арта түседі.

Қолданыстағы ережеге сай, 1975 жылы және одан кейін дүниеге келген қызметкерлер үшін жұмыс берушілер зейнетақы жарнасын өз қаржысы есебінен аударады. Бұл төлем жұмыс берушінің міндетті зейнетақы жарнасы ретінде енгізілген.

Жүйе 2024 жылдан бастап 1,5 пайыздық мөлшерлемемен іске қосылды. Ал алдағы жылдары жарна көлемі біртіндеп көбейеді. Атап айтқанда, 2026 жылы ол қызметкер табысының 3,5 пайызына дейін өссе, 2028 жылға қарай 5 пайызға жетеді.

Мамандар мұндай өзгеріс ынтымақты зейнетақы үлесінің азаюына байланысты қолға алынғанын айтады. Жаңа тетік азаматтардың еңбек табысынан айырылған кездегі шығынын өтеуге, зейнетақымен қамту деңгейін күшейтуге және мемлекет, жұмыс беруші мен қызметкер арасындағы жауапкершілікті тең бөлуге бағытталған.

Бұған дейін зейнетақы жинағындағы қаражатты пайдалану бойынша жаңа шектеулер енгізілетіні туралы да ақпарат тараған еді.