ОПЕК+ құрамындағы жеті ел мұнай өндіру көлемін ұлғайту туралы ортақ шешім қабылдады, ,-деп хабарлайды «Dalamedia» ақпараттық порталы.

3 мамырда Сауд Арабиясы, Ресей, Ирак, Кувейт, Қазақстан, Алжир және Оман өкілдері онлайн форматта бас қосып, әлемдік мұнай нарығындағы ахуал мен алдағы өзгерістерді талқылады.

Кездесу қорытындысы бойынша тараптар мұнай өндіру көлемін тәулігіне шамамен 188 мың баррельге көбейтуге уағдаласты. Бұл өзгеріс 2026 жылдың маусым айынан бастап күшіне енеді. Аталған шешім мұнай нарығындағы тұрақтылықты сақтау мақсатында қабылданған.

Сонымен қатар қатысушы елдер нарықтағы жағдайды тұрақты бақылауда ұстап, қажет болған жағдайда қосымша бағалау жүргізетінін мәлімдеді.

Жеті мемлекет Ынтымақтастық декларациясы аясындағы міндеттемелерді орындауға бейіл екенін тағы растады. Оның ішінде мұнай өндіру көлеміне қатысты ерікті түзетулер де қарастырылған. Бұл бағыттағы жұмыстарды Бірлескен министрлік мониторинг комитеті қадағалайды.

Бұдан бөлек, елдер 2024 жылдың қаңтарынан бері қалыптасқан артық өндіріс көлемін толық өтеуге ниетті екенін жеткізді.

ОПЕК+ аясындағы бұл мемлекеттер нарықтағы ахуалды, міндеттемелердің орындалуын және өтем шараларын талқылау үшін ай сайын кездесіп отырады. Келесі кездесу 2026 жылғы 7 маусымға жоспарланған.