Тараз қаласында кәсіпкер мал өлекселері тасталатын аумақты заңсыз пайдаланып, оны адам жерлейтін қорымға айналдырғаны анықталды, -деп хабарлайды «Dalamedia» ақпараттық порталы.

Мәселе мәслихат депутаттарының алаңдаушылығын туғызды. Олар биотермиялық қалдықтар жатқан жерден қауіпті індет тарауы мүмкін екенін жоққа шығармайды. Белгілі болғандай, жерлеу рәсімімен айналысатын серіктестік бұл аумақты ешқандай рұқсатсыз пайдаланып келген.

Мамандардың айтуынша, мұндай орындардың айналасында кемінде бір шақырым санитарлық қорғаныс аймағы болуы тиіс. Алайда бұл жерде арақашықтық 100 метрге де жетпейді. Сондықтан да нысан аса қауіпті санатқа жатқызылып отыр.

Ветеринария саласының өкілдері де қауіптің барын жасырмайды. Өлексе тасталатын жерде қалдықтар жоғары температурада қыздырылып, кейін шіру процесі жүреді. Мұндай аймақта мал жаюға да, адамдардың жүруіне де рұқсат жоқ. Қалдықтарды тек арнайы қорғаныс киіміндегі қызметкерлер ғана көмуі тиіс.

Ал заңсыз қорымның пайда болуы өткен жылдың соңында басталған. Қазір бұл іске қатысты кімнің жауапты екені, жердің кімге тиесілі екені тексеріліп жатыр. Соған қарамастан, кәсіпкер тиісті құжаттарды рәсімдемей жатып, шамамен 30-ға жуық адамды жерлеп үлгерген.

Серіктестік басшысы бұл аумақты тұрғындардың өтінішімен ретке келтіргенін айтып отыр. Оның сөзінше, енді ғана әкімдіктен рұқсат алуға әрекет жасалмақ. Сонымен бірге, ол мал өлекселері тасталатын жаңа орын қорымға тым жақын орналасқанын түсінбейтінін жеткізді.

Қала әкімдігі жағдайды назарға алып, арнайы жұмыс тобын құратынын мәлімдеді. Олар заңсыз жерлеу деректерін анықтап, тиісті шешім қабылдамақ. Егер кәсіпкердің жерді өз бетінше пайдаланғаны дәлелденсе, оған айыппұл салынуы мүмкін.

Айта кетейік, бұған дейін Шығыс Қазақстан облысында құрылыс жүріп жатқан аумақтан адам сүйектері табылып, тұрғындар арасында алаңдаушылық туындаған еді. Жергілікті халық бұл жерде бұрын жұқпалы аурудан қайтыс болғандар жерленуі мүмкін деп қауіптеніп отыр.