АҚШ Ирандағы бастауыш мектепке жасалған зымыран соққысына себепкер болуы мүмкін, - деп хабарлайды «Dalamedia» ақпараттық порталы «The New York Times» басылымына сілтеме жасап.

28 ақпанда Иранның Минаб қаласындағы Shajarah Tayyebeh бастауыш мектебі ғимаратына «Tomahawk» зымыраны тиген. Алайда кей деректерде соққы нысананы анықтау кезінде кеткен қателіктің салдары болуы мүмкін екені айтылуда. АҚШ әскері мектепке жақын орналасқан Иран әскери базасына соққы беруді жоспарлаған. Алайда нысан координаттары ескірген мәліметтерге сәйкес белгіленген.

Бұл координаттарды АҚШ-тың Орталық қолбасшылығы Қорғаныс барлау агенттігі ұсынған ескі ақпаратқа сүйеніп жасаған. Тергеушілер қазір бұл деректердің неге қайта тексерілмегенін анықтауда.

Иран билігінің мәліметінше, шабуыл салдарынан 175-тен аса адам қаза тапқан, олардың басым бөлігі — балалар. Алайда тергеу әлі аяқталған жоқ. АҚШ билігі бұл оқиғаға қатысты нақты қорытынды шығаруға әлі ерте екенін айтады. Ақ үйдің баспасөз хатшысы Каролин Ливитт те тексеру жалғасып жатқанын мәлімдеді.

Ал АҚШ президенті Дональд Трамп бұл оқиғаға байланысты нақты ақпарат білмейтінін айтып, тергеу нәтижесін күту керек екенін жеткізген.

Әзірге АҚШ әскері мен Пентагон өкілдері оқиғаға қатысты толық түсініктеме берген жоқ. Тергеу барысында барлау құрылымдары мен әскери штабтардың нысан таңдау процесі де тексеріліп жатыр.