Оқиға 6 наурыз күні Нэшвилл қаласынан Форт-Лодердейлге бағыт алған рейс барысында болған. Куәгерлердің айтуынша, ұшақ әуеге көтерілгеннен кейін шамамен жарты сағат өткенде бортсеріктер арасында алаңдаушылық байқалған. Осыдан кейін экипаж жолаушылардан қолдарын көтеріп, бастарын төмен түсіріп отыруды сұраған. Көп ұзамай ұшақ Атланта қаласына мәжбүрлі түрде қонды.

Әлеуметтік желіде тараған видеоларда қауіпсіздік қызметінің өкілдері ұшақ салонына кіріп, бір ер адамды сыртқа алып шығып жатқанын көруге болады. Кейін белгілі болғандай, жолаушы намаз уақытын өткізіп алмау үшін телефонына еске салғыш таймер орнатқан. Телефоннан шыққан дыбыс ұшақ қызметкерлерін алаңдатып, сақтық шараларын қабылдауға түрткі болған.

Кейін әуе компания өкілдері жолаушыларға ешқандай қауіп төнбегенін мәлімдеді. Сондай-ақ аталған жолаушыға ешқандай айып тағылмайтыны хабарланды.