Алатау қаласында жаңа зауыт бой көтереді. Құны 180 миллион долларға бағаланған нысанның құрылысын америкалық Mars компаниясы жүргізеді, – деп хабарлайды «DalaMedia» ақпараттық порталы.

Инвестициялық жоба аясында Алатау қаласында үй жануарларына арналған азық өндіретін зауыт салынбақ. Жаңа өндіріс орны агроөнеркәсіп өнімдерін терең өңдеуге жол ашады. Сондай-ақ құны жоғары тауар шығаруға мүмкіндік бермек.

Аталған келісім Мемлекет басшысының АҚШ-қа сапары аясында жасалды. Қасым-Жомарт Тоқаев «Mars, Incorporated» компаниясының бас атқарушы директоры Пол Вайраухты қабылдады. Кездесу барысында қос тарап арасында инвестициялық келісім жасалды.

Президенттің пікірінше, бұл жоба ұзақ мерзімді стратегиялық әріптестіктің бастауына айналмақ. Өз кезегінде Пол Вайраух жобаны жүзеге асыруға қолдау көрсеткені үшін Қасым-Жомарт Тоқаевқа алғыс білдірді. Оның айтуынша, бұл келісім компанияның өндірістік мүмкіндігін кеңейтіп, Орталық Азия мен оған іргелес нарықтарға өнім жеткізу көлемін арттыруға жол ашады.