Индонезияның Солтүстік Сулавеси провинциясында толассыз жауған нөсер жаңбыр салдарынан болған су тасқыны мен жер көшкіндері кемінде 16 адамның өмірін қиды.

Жергілікті биліктің мәліметінше, бірнеше күнге созылған муссон жаңбырлары өзендердің арнасынан асып, балшық, тас пен қоқыс араласқан су ағыны бірқатар елді мекенді басып қалған. Табиғи апат салдарынан жүздеген тұрғын үйді су шайып кеткен.

Төтенше жағдайларды басқару жөніндегі ұлттық агенттік өкілдері апат аймағынан 600-ден астам адамның эвакуацияланғанын хабарлады. Олар уақытша шіркеулер мен қоғамдық ғимараттарға орналастырылған.

Солтүстік Сулавесидегі іздеу-құтқару қызметінің мәліметінше, ауа райы жақсарып, су деңгейі төмендегеннен кейін 16 адамның мәйіті табылған. Қазіргі уақытта құтқару және іздеу жұмыстары жалғасып жатыр, тағы үш адам хабар-ошарсыз кеткен.