Франция мен Испанияда өршіген ірі орман өрттеріне байланысты 80 мыңнан астам тұрғын қауіпсіз жерге көшірілді, деп хабарлайды «Dalamedia» ақпараттық порталы. Ең күрделі жағдай Францияның Бордо қаласына жақын орналасқан Жиронда департаментінде қалыптасқан. Мұнда жалын 2 400 гектардан астам аумақты шарпыса, аптап ыстық пен қолайсыз ауа райы өртті ауыздықтау жұмыстарын қиындатып отыр.

Испанияда тілсіз жау Мадридке жақын бірнеше елді мекенге тараған. Соның салдарынан 20 мыңға жуық адам эвакуацияланып, шамамен 125 мың гектар жер отқа оранды. Осыған байланысты елде төтенше жағдай жарияланды. Билік әзірге өрттің нақты шығу себебін анықтаған жоқ.

Ал Францияның оңтүстігінде екі ірі орман өртінен 60 мыңнан астам тұрғын қауіпсіз жерге көшірілді. Оның ішінде Жиронда департаментінен 40 мың, Ланда департаментінен 23 мың адам эвакуацияланған. Қазір өрт ошақтарына арнайы авиация арқылы су төгілуде.

Франция президенті Эммануэль Макронның айтуынша, Еуропалық Одақтың азаматтық қорғаныс механизмі аясында Хорватия, Португалия, Чехия және Словакия өртті сөндіруге авиациялық техника жіберген. Сондай-ақ Францияның Қорғаныс министрлігі 20 тоннаға дейін су тасымалдай алатын Airbus A400M әскери-көлік ұшағын жұмылдыруға дайындалып жатқанын хабарлады. Сонымен қатар Марсель маңы мен Атлант жағалауындағы бірқатар өңірлерде де ірі өрт ошақтары тіркелген.