Америкалық кәсіпкер, Tesla мен SpaceX компанияларының негізін қалаушы Илон Маск әлем тарихындағы алғашқы триллионер атанды, -деп хабарлайды «Dalamedia» ақпараттық порталы.

Reuters агенттігінің мәліметінше, SpaceX компаниясының қор нарығына шығуы нәтижесінде Масктың байлығы 1,1 триллион доллардан асты. Осылайша ол мұндай межеге жеткен алғашқы адам ретінде тарихқа енді.

SpaceX алғашқы жария акция орналастыру барысында 75 миллиард доллар инвестиция тартқан. Бұған дейін Forbes журналы кәсіпкердің дәулетін шамамен 780 миллиард доллар деп бағалаған еді. IPO-дан кейін оның SpaceX-тегі үлесінің құны 866 миллиард долларға дейін өскен.

Илон Масктың негізгі активтері тек SpaceX-пен шектелмейді. Ол Tesla, X, Neuralink және The Boring Company компанияларындағы үлестерге де иелік етеді.

Сарапшылардың айтуынша, кәсіпкердің ықпалы бүгінде автомобиль өндірісі, ғарыш саласы, жасанды интеллект және әлеуметтік желілер нарығына дейін таралған. Сонымен қатар оның компаниялары корпоративтік басқару, акционерлер құқығы мен саяси белсенділігіне байланысты жиі сынға ұшырап келеді.

Соған қарамастан инвесторлар Масктың тың идеяларды табысты жобаға айналдыра алатын қабілетіне сенім артады. Нәтижесінде оның компанияларының нарықтық құны рекордтық деңгейге жетіп, кәсіпкерді адамзат тарихындағы алғашқы триллионер атандырды.