Франция астанасы Парижде «Пари Сен-Жерменнің» Чемпиондар лигасындағы жеңісін тойлаған жанкүйерлердің қуанышы бірқатар жерде тәртіпсіздікке ұласты, деп хабарлайды «Dalamedia» ақпараттық порталы.

Клубтың тарихи жеңісінен кейін қала көшелеріне ондаған мың адам жиналып, отшашу атып, ән шырқап, мерекелік шерулер ұйымдастырған. Әсіресе Елисей алаңдары мен «Парк де Пренс» стадионы маңында халық қарасы қалың болған.Алайда мерекелік көңіл-күй ұзаққа созылмай, кей аудандарда жанкүйерлер мен полиция арасында қақтығыстар тіркелді. Тәртіп сақшылары кей жерлерде көзден жас ағызатын газ қолдануға мәжбүр болған.

Ресми мәлімет бойынша, 130-дан астам адам ұсталды. Сонымен қатар бірнеше көлік өртеніп, дүкендер мен қоғамдық нысандарға зақым келген. Кейбір топтар жолдарды жауып, пиротехникалық заттарды полицияға қарай лақтырғаны хабарланды.

Қоғамдық қауіпсіздікті қамтамасыз ету үшін Франция билігі алдын ала күшейтілген шаралар қабылдап, ел бойынша 22 мыңнан астам полиция қызметкерін жұмылдырған. Оның шамамен 8 мыңы Париж көшелерінде қызмет атқарған.

Айта кетейік, былтыр да ПСЖ-ның еурокубоктағы жеңісінен кейін Францияның бірнеше қаласында жаппай тәртіпсіздік болып, жүздеген адам ұсталған еді. Осыған байланысты биыл қауіпсіздік шаралары бұрынғыдан да күшейтілген.