Мәжіліс депутаты Бақытжан Базарбек ай сайын алатын 900 мың теңгеден асатын жалақысы отбасылық шығындарды толық жабуға жетпейтінін айтты, -деп хабарлайды «Dalamedia» ақпараттық порталы.

Депутаттың сөзінше, қазіргі таңда бала тәрбиесіне кететін шығын айтарлықтай артқан. Оның айтуынша, баланы балабақшаға беру, түрлі үйірме мен секцияларға қатыстыру, киім-кешек пен аяқкиім алу үшін айына шамамен 300 мың теңге жұмсалады.

Сондай-ақ ол азық-түлік бағасының қымбаттап жатқанын атап өтті. Базарбектің пікірінше, қазіргі жағдайда тіпті бір миллион теңге көлеміндегі табыс та кей отбасыларға жеткіліксіз болуы мүмкін.

«Мен шамамен 900 мың теңгеден аса жалақы аламын. Бірақ бұл қаражат жеке өзіме толық жетпейді. Сол себепті жұбайымның да жұмыс істеуін сұрадым», – деді депутат Үкімет кулуарында.

Мәжілісмен депутаттардың жалақысын көтеру мәселесіне де тоқталды. Оның айтуынша, жалақыны қайта қарау немесе өсімге қойылған мораторийді алып тастау туралы шешім қабылдау өз құзыретіне кірмейді.

Сонымен қатар ол қазіргі экономикалық ахуалды ескере отырып, мұндай бастаманы дәл қазір орынды санамайтынын жеткізді. Базарбек бұл мәселе алдағы бес жыл ішінде күн тәртібіне шығуы екіталай екенін де жасырмады.