АҚШ президенті Дональд Трамптың ұлдары Қазақстандағы вольфрам өндіру жобасына қатысушы атанды. Бірнеше мәміледен кейін олар Nasdaq биржасына шығуды жоспарлап отырған компанияның үлесіне ие болған, -деп хабарлайды «Dalamedia» ақпараттық порталы.

Эрик Трамп пен кіші Дональд Трамп Қазақстандағы вольфрам кен орындарын игеруге қатысы бар компанияның ортақ иелерінің қатарына қосылған. Бұл туралы Financial Times басылымы өз дереккөздеріне сілтеме жасап хабарлады.

Басылым мәліметінше, ағайынды Трамптар 2025 жылдың тамызында Skyline Builders құрылыс тобының үлесін сатып алған. Кейін бірнеше келісім нәтижесінде Skyline компаниясы Cove Capital инвестициялық тобымен байланысты Kaz Resources компаниясының 20 пайыздық үлесін иеленген. Одан кейін Kaz Resources пен Қазақстандағы жобаларды басқаратын Cove Kaz Capital құрылымы Skyline-мен біріктірілген.

Жаңадан құрылған компания Kaz Resources атауымен Nasdaq биржасында IPO өткізуді жоспарлап отыр.

Сондай-ақ, өткен жылы АҚШ-тың Экспорт-импорт банкі мен Даму қаржыландыру корпорациясы Қазақстандағы вольфрам өндіру жобаларын қолдауға 1,6 млрд долларға дейін қаржы бөлуді мақұлдаған. Жобадағы бақылаушы пакет, яғни 70 пайыз үлес Cove Kaz Capital құрылымына тиесілі.

Кіші Дональд Трамп өкілінің айтуынша, ол бұл жобаға тек пассив инвестор ретінде қатысады. Яғни компанияның күнделікті жұмысына араласпайды және инвестиция салған ұйымдардың мүддесі үшін федералды органдармен байланыс орнатпайды.

Вольфрам стратегиялық маңызы жоғары металл саналады. Ол қорғаныс өнеркәсібінде, электроникада және аса берік қорытпалар өндіруде кең қолданылады. АҚШ Геологиялық қызметінің дерегіне сәйкес, бүгінде әлемдік вольфрам өндірісінің 80 пайыздан астамы Қытайдың үлесінде. Осыған байланысты балама жобалар Батыс елдері үшін ерекше маңызға ие.

Қазақстан вольфрам қоры дәлелденген елдердің қатарында. Ел тау-кен саласына шетелдік инвестиция тарту жұмыстарын белсенді жалғастырып келеді.