Түркістан облысындағы Сарыағаш аудандық ауруханасында соңғы үш айда бес жасқа дейінгі алты бала шетінеп кеткені белгілі болды. Бұл деректі Медициналық және фармацевтикалық бақылау комитеті растап, тексеріс барысында бірқатар заңбұзушылық анықталғанын мәлімдеді,-деп хабарлайды «Dalamedia» ақпараттық порталы.

Қайғылы жағдайға байланысты ата-аналар дәрігерлердің әрекетіне күмән келтіріп отыр. Солардың бірі – Бекжан Төлегенов пен Майра Жұмашева сегіз айлық ұлдарынан айырылған. Олардың айтуынша, бала екпеден кейін жағдайы күрт нашарлаған. Ауруханаға жеткізілгенімен, дәрігерлер тиісті тексеру жүргізбеді деп есептейді. Нәресте жансақтау бөлімінде 16 сағаттан соң көз жұмған.

Тағы бір тұрғын Нұрбақыт Құрақбай екі жасар ұлынан айырылғанын айтты. Әкесінің сөзінше, баласын ауруханаға өз аяғымен алып барған. Алайда арада екі күн өткенде оның мәйітін алып шыққан. Ол да дәрігерлердің салғырттығына шағымданып отыр.

Ауылдағы тағы бір отбасы екі ай бұрын бірден екі немересінен айырылған. Бірі дүниеге келе сала шетінеп кетсе, екіншісі екі жасында көз жұмған. Туыстарының айтуынша, балаларға көрсетілген медициналық көмектің сапасына күмән бар.

Жергілікті тұрғындар мұндай жағдайлардың жиілеп кеткеніне алаңдап, аурухана жұмысына наразылық білдірген. Ал медициналық мекеме өкілдері жыл басынан бері 2500 бала емделгенін, олардың алтауы қайтыс болғанын растады. Үш бала бір тәуліктің ішінде көз жұмған.

Тексеріс нәтижесінде анықталған заңбұзушылықтар бойынша материалдар полицияға жолданды. Қазір әрбір дерекке қатысты сот-медициналық сараптама тағайындалған. Егер дәрігерлердің кінәсі дәлелденсе, жауаптылар заң алдында жауап береді.