Нигерияның солтүстік-шығысындағы Йобе штатында әскери әуе соққысы салдарынан кемінде 200-ден астам адам көз жұмды,-деп хабарлайды «Dalamedia» ақпараттық порталы.

Оқиға Йобе мен Борно штаттарының шекарасына жақын орналасқан Джилли ауылындағы базарда болған. Бұл аумақта әскери күштер «Boko Haram» тобының содырларына қарсы операция жүргізіп жатқан.

Жергілікті билік өкілдерінің бірі, Фучимерам округінің дәстүрлі жетекшісі әрі кеңесші Лаван Занна Нура Гейдамның айтуынша, қаза тапқандар саны 200-ден асып отыр. Оның сөзінше, жараланғандар жақын маңдағы Йобе мен Борно штаттарының ауруханаларына жеткізілген.

Әуе соққысы мен оның салдары жөніндегі ақпаратты бірнеше жергілікті тұрғын мен халықаралық гуманитарлық ұйым өкілдері де растаған.

Нигерия Әскери-әуе күштері болса Джилли ауданында «Boko Haram» содырлары жойылғанын мәлімдеді.

Ал Йобе штатының төтенше жағдайлар қызметі базардағы жағдай бойынша алдын ала дерек келіп түскенін, саудагерлер арасында құрбандар бар екенін және тиісті шаралар қолға алынғанын хабарлады.

Жараланғандардың бірі, 43 жастағы медициналық тауарлар сатушысы Ахмед Али жарылыс сәтін еске алып, қашып құтылуға тырысқанын, кейін өзге адамдармен бірге жерге жата қалғанын айтқан.