Астанада Петрова көшесі, 2-мекенжайындағы тұрғын үй ауласында 39 жастағы ер адамның оғаш әрекеті тұрғындарды шошытты,-деп хабарлайды «Dalamedia» ақпараттық порталы. Ол жалаңаш күйде балалар ойын алаңына кіріп, қолына пышақ ұстап, айналасындағыларға қоқан-лоқы көрсеткен.

Куәгерлердің айтуынша, ер адам алаң ішінде жүгіріп жүріп, балаларға айқайлап, «Сені пышақтап тастаймын!» деп қорқытқан. Оқиға кезінде аулада болған ата-аналар мен балалар жан-жаққа қашып, бірден полицияға хабар берген.

Құқық қорғау қызметкерлері шамамен 20 минуттан кейін оқиға орнына жетіп, күдіктіні ұстады. Абырой болғанда, ешкім зардап шеккен жоқ.

Ұсталған азамат Алматы аудандық полиция басқармасына жеткізілді. Сот оны ұсақ бұзақылық жасағаны үшін кінәлі деп танып, 20 тәулікке әкімшілік қамауға алу жазасын тағайындады. Ер адамның мұндай әрекетке не себепті барғаны әзірге белгісіз.

Еске салайық, биыл ақпанда Жамбыл облысында да осындай жағдай тіркелген еді. Ол кезде ер адам қоғамдық орында тыр жалаңаш жүрген.

Полиция мұндай әрекеттердің заңға қайшы екенін атап өтіп, қоғамдық тәртіпті бұзғандарға қатысты әкімшілік шара қолданылатынын ескертті.