Мемлекеттік мүлік және жекешелендіру департаменті жариялаған мәліметке сүйенсек, 2024 жылы шыққан қара түсті көлік 79,4 миллион теңгеге бағаланған. Хабарландыруда автокөлікпен бірге Pandora дабыл жүйесінің кілті берілетіні көрсетілген. Алайда аккумуляторы отырып қалғандықтан, оның техникалық жағдайын толық тексеру әзірге мүмкін болмай отыр.

Құжатта көлікке арест түріндегі шектеу қойылғаны да айтылған. Сондай-ақ ол қандай да бір мемлекеттік органның балансына берілмейтіні нақтыланған. Сауда-саттық 2026 жылдың 7 сәуіріне жоспарланған.

Айта кетейік, бұған дейін Қаржылық мониторинг агенттігі Перизат Қайраттан тәркіленген мүліктердің аукцион арқылы сатылатынын мәлімдеген еді. Тізімге елордадағы бірнеше тұрғын үй кешендеріндегі пәтерлер мен автотұрақтар, сондай-ақ бірқатар қымбат автокөліктер енген.

Сонымен қатар, оның иелігіндегі «Rebel Flowers» компаниясындағы үлесі, ондаған миллион теңге мен шетел валютасы да тәркіленген.

Перизат Қайрат – Biz Birgemiz Qazaqstan қайырымдылық қорының бұрынғы жетекшісі ретінде танылған. Ол ірі көлемдегі қаражатты жымқырды деген күдікке ілініп, кейін сот шешімімен 10 жылға бас бостандығынан айырылған.