«Азаматтарға арналған үкімет» мемлекеттік корпорациясының TengriHOME жүйесіне берген жауабына сәйкес, елде 10-нан астам пәтері бар 1 267 адам тіркелген. 2026 жылғы 27 ақпандағы дерек бойынша:

• Екі пәтерден көпке ие азаматтар – 172 236;

• Бес пәтерден асатын меншік иелері – 11 072;

• 20-дан көп пәтері барлар – 281 адам;

• 50-ден астам пәтерге ие 74 адам бар.

Ең ерекше дерек – бір жеке тұлғаның атына тіркелген пәтерлердің ең көп саны 1015-ке жеткені. Қазақстан бойынша жалпы 3 470 289 пәтер тіркелген.

Сарапшылардың айтуынша, бұл дерек тұрғын үй нарығындағы ірі инвесторлардың үлесіне қатысты. Көбіне пәтерлерді жеке сатып алушылар емес, тұтас подъездерді сатып алатын ірі инвесторлар иемденеді.

Ұлттық статистика бюросының мәліметіне қарағанда, 2025 жылы Қазақстандағы тұрғын үй қорының жалпы ауданы 447,3 млн шаршы метрді құраған. Бір тұрғынға шаққанда тұрғын үймен қамтамасыз ету көрсеткіші 25,1 шаршы метр, ал қалаларда – 27,4 шаршы метр, ауылдық жерлерде – 21,3 шаршы метр деңгейінде болған.