Маңғыстау облысында бір ауыл тұрғындары соңғы бес жыл бойы жер асты суларының көтерілуінен зардап шегіп келеді. Үйлердің іргетасынан су шығып, кейбір баспаналарды су басқан, -деп хабарлайды «Dalamedia» ақпараттық порталы.

Тұрғындардың айтуынша, көктем сайын жағдай одан әрі қиындайды. Жертөлелер суға толып, адамдар іс жүзінде судың ішінде өмір сүруде. Атамекен ауылының тұрғыны Ұлдай Жансайытова 2022 жылы көшіп келгенін айтып, денсаулығы нашарлағанын жеткізді: «Маған құрғақ жерімді қайтарып берсін немесе басқа жерге көшірсін. Қазір артрит пайда болды», – дейді ол.

Әкімдік мәселені шешу үшін жаңа дренаж жүйесін салу қажеттігін мойындайды. Оның құны шамамен 2,5 млрд теңге деп бағаланған. Мұнайлы ауданы әкімінің орынбасары Асхат Нұрмұхан қаржыландыру мәселесі әлі қаралып жатқанын, жұмыстың нақты қашан басталатыны белгісіз екенін хабарлады.