Елімізде жеке детективтердің қызметін заң жүзінде реттеу мәселесі Мәжіліс қабырғасында талқыланды. Жаңа заң жобасы қабылданса, Қазақстанда жеке детективтік қызмет ресми түрде жұмыс істей бастауға мүмкіндік алады.

Бастаманы депутат Снежанна Имашева таныстырды. Оның айтуынша, бұл құжаттың мақсаты – азаматтардың өз құқықтары мен заңды мүдделерін қорғау тетіктерін кеңейту. Сонымен бірге салаға айқын ереже енгізілмек.

Заң жобасында бірнеше маңызды мәселе қамтылған. Атап айтқанда, кімнің жеке детектив бола алатыны, детективтік агенттіктердің қалай жұмыс істейтіні, лицензиялау тәртібі мен мемлекеттік бақылау тетіктері нақты көрсетіледі.

Қазір елімізде жеке детективтік қызмет заңмен толық реттелмеген. Яғни бұл бағыттағы жұмыс «көлеңкелі» сипатта қалып отыр.

Егер заң жобасы қабылданса, жеке детективтердің жұмысы алғаш рет ашық әрі заң аясында жүргізілмек.