Қазақстанда жол құрылысының талаптары мен сапаны бақылау тәртібі өзгереді. Премьер-министр Олжас Бектенов Үкімет жанындағы жұмыс тобына 1 желтоқсанға дейін саланы реформалау бойынша нақты ұсыныстар әзірлеуді тапсырды, -деп хабарлайды «Dalamedia» ақпараттық порталы.

Жоспарланған өзгерістер аясында қолданыстағы құрылыс нормалары мен стандарттар қайта қаралып, жол сапасын бағалау жүйесі жетілдіріледі. Сондай-ақ саланы басқаруға цифрлық технологияларды енгізу мәселесі қарастырылады. Басты мақсат – жолдардың сапасын арттырып, бюджет қаражатының жұмсалуына ашықтық қамтамасыз ету.

Жұмыс тобына премьер-министрдің бірінші орынбасары жетекшілік етеді. Оның құрамына жеті министрліктің өкілдері, Бас көлік прокурорының орынбасары, «ҚазАвтоЖол» мен «ҚазМұнайГаз» басшылығы және салалық ұйымдардың өкілдері енген. Бұдан бөлек, ұсыныстар әзірлеуге сала сарапшылары мен Құрылтай депутаттары да қатысады.

1 желтоқсанға дейін жұмыс тобы заңнамаға енгізілетін өзгерістерді қамтитын ұсыныстар пакетін дайындап, Үкіметке ұсынуы керек.

Жұмыс тобы Қазақстан Халық кеңесінің алғашқы сессиясынан кейін Мемлекет басшысының тапсырмасымен құрылған.

Айта кетейік, бұған дейін Respublica партиясының депутаты Мейірхат Қасымбаев премьер-министр Олжас Бектеновке депутаттық сауал жолдаған болатын. Ол Қазақстанның негізгі трансшекаралық автомобиль жолдарын I техникалық санатқа дейін жеткізуді ұсынған еді.