Ақтөбе облысында мейрамханада өткен тойдан кейін тамақтан уланып, ауруханаға түскен әйел сот арқылы кәсіп иесінен 220 мың теңге өтемақы өндіріп алды. Қаражат емделуге кеткен шығын мен моральдық зиян үшін төленетін болды, деп хабарлайды «Dalamedia» ақпараттық порталы.

Оқиға жазда Қандыағаш қаласындағы «Тұмар» мейрамханасында болған. Той мен садақаға қатысқан 188 адам тамақтан уланып, олардың 177-сі ішек инфекциясының белгілерімен ауруханаға жеткізілген.

Жәбірленушілердің бірі емделуге жұмсаған ақшасын қайтарып, моральдық зиян үшін өтемақы алу мақсатында сотқа жүгінген.

Мұғалжар аудандық сотының мәліметінше, мейрамхана иесі талапты толық мойындамаған. Ол әйелдің дәрі-дәрмек пен емделуге кеткен шығындарын өтеуге келіскенімен, моральдық зиян үшін өтемақы төлеуден бас тартқан.

Алайда сот талап қоюшының пайдасына шешім шығарды. Нәтижесінде мейрамхана иесінен емделуге жұмсалған 22 725 теңге және моральдық зиян үшін 200 мың теңге өндірілді. Осылайша, әйелге жалпы 222 725 теңге төлеу міндеттелді.

Еске салайық, «Тұмар» мейрамханасындағы жаппай улану дерегінен кейін қылмыстық іс қозғалған. Аталған оқиғаға байланысты Қылмыстық кодекстің 304-бабы, яғни санитариялық қағидалар мен гигиеналық нормативтерді бұзу бойынша сотқа дейінгі тергеу жүргізілген.