Астанада жаңа әуежай салу жобасына Сингапурдың Changi Airport Group компаниясының еншілес ұйымы — Changi Airports International (CAI) қатысады. Осыған байланысты Астана әкімдігі, Қазақстанның Көлік министрлігі және сингапурлық компания елордадағы әуежай инфрақұрылымын дамыту бойынша ынтымақтастық туралы негіздемелік келісімге қол қойды, — деп хабарлайды «Dalamedia» ақпараттық порталы.

Келісім аясында тараптар Астанада жаңа әуежай салу жобасын бірлесіп жүзеге асыруға уағдаласқан. Жоба Қазақстан президенті Қасым-Жомарт Тоқаевтың халықаралық авиациялық хаб құру және елорданың транзиттік әлеуетін арттыру жөніндегі тапсырмасы аясында қолға алынбақ.

Сонымен қатар Changi Airports International қазіргі Астана халықаралық әуежайын дамытуға да қатысуы мүмкін. Компанияның нысанды басқару, операциялық қызметіне араласу және әуежайды дамытудың басқа да бағыттарына атсалысуы қарастырылып отыр.

Қазір тараптар болашақ серіктестіктің құрылымын, жобаларды іске асыру шарттарын және қажетті құжаттарды талқылап жатыр.

Негіздемелік келісімге Астана әкімінің орынбасары Евгений Глотов, көлік вице-министрі Талғат Ластаев және Changi Airports International компаниясының бас директоры Юджин Ган қол қойған.

Бұл келісім тамыз айында Қазақстанда өткен келіссөздердің жалғасы болды. Сол кезде Changi Airport Group өкілдері жаңа әуежай салу және Астананы өңірлік авиациялық хаб ретінде дамыту бағытында сараптамалық қолдау көрсетуге дайын екенін мәлімдеген.

Бұған дейін Астанада жаңа әуежай салу кезінде Сингапурдағы Чанги әуежайының тәжірибесі пайдаланылатыны хабарланған болатын. Бұл туралы президент Қасым-Жомарт Тоқаевтың Сингапурдың аға министрі Ли Сянь Лунмен кездесуінде айтылған еді.