Астанада пәтер, коммерциялық нысан және автотұрақ сатамыз деп азаматтарды алдап, 3 миллиард теңгеден астам қаржыны иемденген төрт адам сотталды, — деп хабарлайды «Dalamedia» ақпараттық порталы.

Сот мәліметінше, қылмыстық іс бойынша 51 адам жәбірленуші деп танылған. Айыпталушылар Б., Е., Ч. және Д. азаматтарға жылжымайтын мүлік сатуды ұсынып, олардың ақшасын өздерінің жеке шоттарына аудартқан немесе қолма-қол алған.

Сотта анықталғандай, күдіктілер сатып алушыларға жалған сатып алу-сату шарттарын көрсетіп, сеніп тапсырылған қаражатты өз пайдасына жаратқан. Клиенттерден алынған 3 миллиард теңгеден астам ақша компанияның есепшотына түспеген. Осыған байланысты кәсіпорынға да материалдық шығын келген.

Төрт адамға алаяқтықты ұйымдастырды және оны жасауға көмектесті деген айып тағылған. Бұдан бөлек, олар қызметтік жағдайын пайдаланып, аса ірі мөлшерде ақша жымқырды және ақпаратты жасырын алуға арналған арнайы техникалық құралдарды заңсыз сатып алып, пайдаланған деп танылған.

Сотталушылар өз кінәсін мойындамаған. Қорғау тарапы оларды ақтауды сұраған. Ал шығыны өтелмеген жәбірленушілер соттан қатаң жаза тағайындауды талап еткен.

Сот шешімімен төрт азамат 8 және 9 жылға бас бостандығынан айырылды. Сонымен қатар олардың барлығына 10 жыл бойы жылжымайтын мүлік сатуға байланысты қызметпен айналысуға тыйым салынды.

Үкім 12 тамызда жарияланды. Алайда сот шешімі әзірге заңды күшіне енген жоқ.