Қазақстанда балаларды бірінші сыныпқа қабылдау науқаны жалғасуда. Биыл 380 мыңнан астам бала мектеп табалдырығын алғаш рет аттайды. Қазір олардың 320 мыңға жуығы, яғни болжамды көрсеткіштің 84 пайызы мектепке қабылданған, -деп хабарлайды «Dalamedia» ақпараттық порталы.

Қабылданған балалардың 296 мыңға жуығы мемлекеттік, 23 мыңнан астамы жекеменшік мектептерде оқиды. Оның ішінде 191 мыңға жуық бала қала мектептеріне, 128 мыңға жуығы ауыл мектептеріне қабылданған. Сондай-ақ ерекше білім беру қажеттіліктері бар 4 мыңға жуық бала бірінші сыныпқа қабылданды.

Болашақ оқушылардың 71 пайыздан астамы қазақ тілінде білім беретін сыныптарды таңдаған. Ал 26 пайыздан астамы орыс тіліндегі сыныптарға қабылданса, шамамен 2,5 пайызы өзге тілдерде білім алатын сыныптарға барған. Өзге ұлт өкілдерінің 2 мыңнан астам баласы қазақ тілінде білім беретін сыныптарды таңдаған.

Бірінші сыныпқа құжат қабылдау 27 мамыр мен 31 тамыз аралығында жүргізіледі. Ата-аналардың 84 пайызға жуығы өтінішті электронды түрде берген. Құжаттарды eGov.kz порталы, eGov Mobile қосымшасы немесе таңдалған мектеп арқылы тапсыруға болады.

Бірінші сыныпқа қабылданатын оқушылар саны бойынша Түркістан облысы көш бастап тұр. Мұнда 50 мыңнан астам бала мектепке барады. Одан кейін Алматы облысы – 35 мыңнан астам, Астана – 33 мың, Алматы – 31 мыңнан астам және Шымкент – 29 мыңнан астам баламен орналасқан.