Қазақстан футбол федерациясы Нидерланд маманы Джон ван'т Схиппен ұлттық құраманың бас бапкері қызметіне тағайындау туралы келісімге келді, — деп хабарлайды «Dalamedia» ақпараттық порталы.

Маманның қызметке тағайындалуы Қазақстан футбол федерациясының Жарғысына сәйкес Атқару комитетінің келісімінен кейін ресми түрде бекітіледі. Алдағы күндері комитет отырысы өтіп, содан кейін Джон ван'т Схиппен келісімшарт жасалады.

Джон ван'т Схип футболшы ретінде Амстердамның «Аякс» және Италияның «Дженоа» клубтарында ойнаған. Сондай-ақ Нидерланд ұлттық құрамасының сапында өнер көрсетіп, 1988 жылы Еуропа чемпионы атанды.

Бапкерлік мансабын «Аякс» жүйесінде бастаған маман кейін бұл клубпен қатар «Твенте», «Зволле», Мексиканың «Гвадалахара» және Аустралияның «Мельбурн Сити» командаларын жаттықтырды. 2016 жылы «Мельбурн Ситимен» бірге Аустралия кубогын жеңіп алды.

Ван'т Схип халықаралық деңгейде Грекия және Армения ұлттық құрамаларының бас бапкері қызметін атқарған.

Қазақстан құрамасының жаңа жаттықтырушылар штабына Нұрбол Жұмасқалиев пен Елдос Ахметов бас бапкердің көмекшілері ретінде, Юрий Новиков қақпашылар бапкері ретінде, Вадим Боровский дене дайындығы жөніндегі бапкер ретінде, ал Тимур Құсайынов аналитик ретінде кіреді.

Еске салайық, Талғат Байсуфинов 2026 жылдың маусымында Қазақстан ұлттық құрамасының бас бапкері қызметінен кеткен болатын. Ол ұлттық құраманы әр кезеңде үш рет жаттықтырды. Соңғы қызметінде 2026 жылғы әлем чемпионатының іріктеу кезеңінде Бельгиямен тең түсіп, FIFA рейтингіндегі Қазақстан көрсеткішінің жақсаруына үлес қосты. Қазақстан футбол федерациясы маманға еңбегі үшін алғыс айтып, отставкасын қабылдаған.