Қарағанды облысында жол-көлік оқиғасы салдарынан 29 жастағы футболшы, көкшетаулық “Елім-Ай” клубының ойыншысы Илья Буртовой көз жұмды. Апат Абай – Қарағанды тасжолында болған, — деп хабарлайды «Dalamedia» ақпараттық порталы.

Оқиғадан кейін спортшы ауыр халде профессор Х.Ж. Макажанов атындағы көпсалалы ауруханаға жеткізілген. Дәрігерлер бар күшін салғанымен, оның өмірін сақтап қалу мүмкін болмады.

Илья Буртовой кәсіби футболдағы жолын 2015 жылы “Шахтер-Булат” командасында бастаған. Кейін футзалға ауысып, Қарағандының “Прогресс” клубы сапында Қазақстан кубогында өнер көрсетті. Сондай-ақ ол “Скаут” балалар футбол клубында жаттықтырушы ретінде жұмыс істеген.

Бұдан бөлек, спортшы еліміздегі әуесқой деңгейдегі мықты командалардың бірі саналатын FC BIRLIK құрамында ойнап, өткен жылы осы ұжыммен бірге шағын футболдан әлем чемпионатына қатысқан.

2025 жылы Илья Буртовой Көкшетаудың “Елім-Ай” клубы сапында Қазақстан кубогы мен Бірінші лига ойындарында өнер көрсетті.

Илья Буртовой 1996 жылы дүниеге келген. Ол 29 жасында өмірден өтті.