Алматының Әуезов ауданында «Халық қатысатын бюджет» бағдарламасы аясында жаңа қоғамдық кеңістіктер абаттандырылып жатыр. Жоба барысы өңірлік коммуникациялар қызметі ұйымдастырған баспасөз турында таныстырылды, -деп хабарлайды «Dalamedia» ақпараттық порталы.

Жаңартылып жатқан нысандардың бірі – Тастақ-1 шағынауданындағы №6 тұрғын үйдің ауласы. Жалпы аумағы 920 шаршы метрді құрайтын жоба 1200-ден астам тұрғынға арналған. Қазіргі таңда құрылыс жұмыстарының 85 пайызы аяқталған. Мұнда арнайы жабын төселіп, шағын сәулет нысандары орнатылып, аумақ толық абаттандырылып жатыр. Жоба аяқталған соң балалар ойын алаңы, 22 шағын сәулет нысаны, орындықтар, қоқыс жәшіктері, жарықтандыру және бейнебақылау жүйесі пайдалануға беріледі.

Сондай-ақ Тастақ-1 шағынауданындағы №7 және №8 тұрғын үйлердің арасынан жаңа саябақ салынып жатыр. Бұл жоба да аталған бағдарлама аясында жүзеге асырылып, 1200-ден астам тұрғынның игілігіне ұсынылады. Демалыс аймағында ойын алаңы салынып, шағын сәулет нысандары, жарықтандыру және бейнебақылау жүйесі орнатылады. Бұдан бөлек, аумаққа 5 мыңға жуық бұта отырғызылып, 2 мың шаршы метр жер көгалдандырылады және автоматты суару жүйесі іске қосылады.

Әуезов ауданының әкімі Абзал Егембердиевтің айтуынша, бұл жобалардың барлығы тұрғындардың ұсынысы негізінде қолға алынған. Оның сөзінше, басты мақсат – халыққа үйінің маңынан жайлы әрі қауіпсіз демалыс орнын қалыптастыру. Қазір жұмыстар белгіленген кестеге сай жүргізіліп жатыр.

Екі нысанның құрылысы биыл мамыр айында басталған. Жоспар бойынша абаттандыру жұмыстары 25 тамызға дейін толық аяқталып, жаңа қоғамдық кеңістіктер тұрғындардың пайдалануына беріледі.