Жаңа оқу жылы қарсаңында әлеуметтік осал санаттағы отбасылардың балаларына мектепке қажетті заттарды сатып алуға мемлекеттен қаржылай көмек көрсетіледі. Биыл бұл қолдау шамамен 450 мың оқушыны қамтиды, — деп хабарлайды «Dalamedia» ақпараттық порталы.

Оқу-ағарту министрлігінің мәліметінше, 1 тамыз бен 30 қыркүйек аралығында Жалпыға міндетті білім беру қоры арқылы мектеп формасын, аяқ киім мен оқу құралдарын алуға арналған төлем беріледі. Бұл мақсатқа жергілікті бюджеттен шамамен 23 миллиард теңге бөлінген.

Бір балаға берілетін ең төменгі төлем мөлшері – 50 851 теңге. Бұл өткен жылмен салыстырғанда 10 пайызға жоғары. Жергілікті бюджеттің мүмкіндігіне қарай кейбір өңірлерде бұл сома бұдан да көп болуы мүмкін.

Қаржылай көмек жетім балаларға, ата-анасының қамқорлығынсыз қалған оқушыларға, аз қамтылған және атаулы әлеуметтік көмек алатын отбасылардың балаларына, сондай-ақ өмірлік қиын жағдайға тап болған оқушыларға беріледі.

Төлемді алу үшін ата-аналар немесе заңды өкілдер қажетті құжаттарды баласы білім алатын мектепке тапсыруы тиіс.

Еске салайық, бұған дейін елімізде 2026–2027 оқу жылынан бастап 7-сыныпқа дейінгі оқушылардың мектепте смартфон қолдануына шектеу енгізу жоспарланып отырғаны хабарланған болатын.