Жаңа оқу жылы жақындаған сайын елімізде жалдамалы баспана нарығында баға қайта өсе бастады. Студенттердің оқу маусымына дайындалуы сұранысты арттырып, соның әсерінен пәтер жалдау құны қымбаттап отыр, деп хабарлайды «Dalamedia» ақпараттық порталы.

Krisha.kz мәліметінше, соңғы бір айда Қазақстан бойынша тұрғын үйді жалға алудың орташа бағасы 3,1 пайызға өскен. Сарапшылардың дерегіне сүйенсек, осы аралықта бірде-бір өңірде жалдау ақысы арзандамаған. Тек Тараз бен Түркістанда ғана баға өзгеріссіз қалған.

Шілде айында жалдау құны ең көп өскен қалалар қатарында Астана, Қонаев, Талдықорған және Қостанай бар. Ал Алматыда пәтер бағасы 3,4 пайызға, Шымкентте 3,2 пайызға қымбаттаған.

Биыл жазда Астанада бір және үш бөлмелі пәтерлерді жалдау құны Алматыдағы бағадан асып түсті.

📊 Орташа жалдау бағасы:

🏙 Астана
▪️ 1 бөлмелі – 220 мың теңге
▪️ 3 бөлмелі – 500 мың теңге

🏙 Алматы
▪️ 1 бөлмелі – 210 мың теңге
▪️ 3 бөлмелі – 400 мың теңге

Мамандардың айтуынша, мұндай айырмашылық Астанадағы пәтерлердің аумағы кеңірек болуымен байланысты. Сондықтан шаршы метрінің құны төменірек болғанымен, жалпы жалдау ақысы жоғары болып шығады.

Сарапшылар бағаның өсуін жаңа оқу жылы қарсаңында жалдамалы баспанаға сұраныстың артуымен түсіндіреді. Әсіресе, жатақханадан орын ала алмаған студенттердің пәтер іздеуі нарықтағы бағаның көтерілуіне ықпал еткен. Мәселен, Алматыда 220 мыңнан астам студент білім алады. Олардың 150 мыңға жуығы өзге өңірлерден келген.