Маусым айында Қазақстанда доллардың орташа айлық бағамы 3,9 пайызға өсіп, 469,52 теңгеден 487,85 теңгеге дейін көтерілді. Осы кезеңде халық арасында шетел валютасына деген сұраныс та шамамен екі есеге артқан, — деп хабарлайды «Dalamedia» ақпараттық порталы.

Қазақстан Ұлттық банкінің мәліметінше, 2026 жылдың алғашқы жартыжылдығында доллар бағамы теңгеге шаққанда біртіндеп төмендеген. Атап айтқанда, қаңтарда америкалық валюта бағамы орта есеппен 507,64 теңге болса, сәуірде 469,15 теңгеге дейін түскен. Ал мамыр айында бұл көрсеткіш 469,52 теңге деңгейінде сақталған.

Бағамның төмендеуімен қатар долларға деген сұраныс та азайған. Қаңтарда айырбастау орындарындағы доллардың таза сатылым көлемі 150,3 млрд теңгені құраса, кейінгі айларда көрсеткіш төмендеп, мамырда 65,3 млрд теңгеге дейін азайған.

Алайда маусымда жағдай өзгерді. Доллардың орташа бағамы 487,85 теңгеге дейін өскен кезде, халықтың шетел валютасын сатып алуға қызығушылығы да артқан. Ұлттық банк дерегіне сәйкес, доллардың таза сатылым көлемі 126,5 млрд теңгеге жетті.

Сонымен бірге еуроға деген сұраныс та өскен. Бұл валюта бойынша көрсеткіш 2,2 есеге артып, 25,7 млрд теңгені құрады.

Ал ресей рубліне керісінше сұраныс төмендеген. Көрсеткіш минус 17,5 млрд теңге болған. Бұл халықтың рубль сатып алғаннан гөрі, оны айырбастау орындарына өткізуі көбірек болғанын көрсетеді.

Өзге валюталар бойынша көрсеткіштер мынадай:

• фунт стерлинг бойынша — 308,3 млн теңге көлемінде таза сатылым;
• юань бойынша — 76,9 млн теңге.

Айта кетейік, бұған дейін ақпан және наурыз айларында Қазақстанда рубльге деген сұраныс артқан болатын. Алдымен ресей валютасының таза сатылымы 1,1 млрд теңгені құраса, кейін бұл көрсеткіш 7,4 млрд теңгеге дейін өскен.