Маңғыстау облысында әлемге танымал актер Джеки Чан қатысатын халықаралық киножобаның түсірілімі басталды, ,-деп хабарлайды «Dalamedia» ақпараттық порталы.

Әңгіме «Доспехи бога 4: Ультиматум» фильмі туралы болып отыр. Картинаның алғашқы көріністері өңірдің көркем табиғатымен ерекшеленетін аумақтарында түсірілген.

Облыс әкімдігінің мәліметінше, фильмнің негізгі түсірілім орындарының бірі ретінде әлемге әйгілі Бозжыра шатқалы таңдалған. 7-12 маусым аралығында аталған аумақта 35 адамнан құралған түсірілім тобы жұмыс жүргізді.

Өңір басшылығы шығармашылық ұжымға қолдау көрсетуге дайын екенін жеткізді. Облыс әкімі Нұрдәулет Қилыбайдың айтуынша, Маңғыстаудың табиғи ерекшеліктері ірі киножобаларды жүзеге асыруға мол мүмкіндік береді.

Оның сөзінше, өңір креативті экономиканы дамытуға, мәдени мұраны насихаттауға және туристік әлеуетті арттыруға бағытталған бастамаларды қолдауға әзір.

Әкімдік өкілдері бұл жобаның отандық кино саласы үшін маңызды екенін атап өтті. Халықаралық фильм арқылы Маңғыстаудың табиғи және тарихи нысандары әлемдік аудиторияға кеңінен таныстырылып, ішкі туризмнің дамуына серпін беруі мүмкін.

Сарапшылардың пікірінше, мұндай ауқымды жоба туристердің қызығушылығын арттырып қана қоймай, өңірдің инвестициялық тартымдылығына және Қазақстанның халықаралық беделінің нығаюына оң әсер етеді.

Жоспар бойынша түсірілім жұмыстары биыл аяқталады. Ал фильмнің көрерменге жол тартуы 2027 жылдың ақпан айына жоспарланып отыр.