2026 жылғы 25 сәуірде Жамбыл облысының Талас ауданында «Қызғалдақ мұра» халықаралық фестивалі ұйымдастырылады. Бұл шара өңірді Грейг қызғалдағының отаны ретінде әлемге танытып, табиғи байлықты сақтауға бағытталған,-деп хабарлайды «Dalamedia» ақпараттық порталы.

Фестивальдің басты мақсаты – аймақтың туристік әлеуетін арттыру, табиғи қызғалдақ алқаптарын қорғау және оны өңірдің бірегей брендіне айналдыру. Іс-шараға отандық және шетелдік мамандар, ғалымдар мен халықаралық ұйым өкілдері қатыспақ.

Мерекелік бағдарлама аясында қонақтар үшін «Қымызмұрындық» дәстүрі көрсетіліп, ұлттық сусынның дайындалу жолы таныстырылады. Сонымен қатар қолөнер көрмесі, жәрмеңке, ұлттық ойындар мен концерттік кештер өтеді.

Фестиваль барысында халықаралық әріптестік аясында Нидерланд Корольдігінен Жамбыл өңіріне 40 мың дана қызғалдақ тұқымын сыйға тарту жоспарланып отыр. Бұл бастама алдағы уақытта аймақтың табиғи келбетін ажарландырып, туристер қызығушылығын арттыруға серпін береді.

Мұндай ауқымды шара өңір экономикасының дамуына, әсіресе ішкі және сыртқы туризмді ілгерілетуге, сондай-ақ мәдени және ғылыми байланыстарды нығайтуға ықпал етпек.