10 маусым күні «Инклюзивті Ассамблея» жобасы аясында «Өмірге құштар жандар» атты танымдық экскурсия ұйымдастырылды, -деп хабарлайды «Dalamedia» ақпараттық порталы. Іс-шараны Жамбыл облыстық көзі көрмейтін және әлсіз көретін азаматтар кітапханасы, «Ежелгі Тараз ескерткіштері» мемлекеттік тарихи-мәдени музей-қорығы және Жамбыл облысы әкімдігі ақпарат және қоғамдық даму басқармасының «Қоғамдық келісім» КММ бірлесе өткізді.

Танымдық шараға «Қазақ зағиптар қоғамының» мүшелері қатысты. Экскурсияның негізгі бөлігі «Көне Тараз» тарихи-мәдени кешенінде өтті.

Бағдарлама барысында экскурсия жетекшісі Ақгүл Жанболатқызы Алтынбекова қатысушыларға өңірдің бай тарихи-мәдени мұрасы жөнінде кеңінен мәлімет берді. Ол көне Тараз қалашығындағы алғашқы қоныстар, керуен сарайлар, моншалар, зындан мен медреселердің тарихына тоқталды.

Әсіресе, 2011 жылғы археологиялық қазба жұмыстары кезінде ескі Көк базардың орнынан табылған көне қалашықтың тарихы қатысушылардың ерекше қызығушылығын тудырды.

Шара соңында қатысушылар өзара пікір алмасып, тарихи кешен аумағында естелік суретке түсті.